學校/幼稚園/幼稚園暨幼兒中心/幼兒中心預防傳染病指引
第五節
示範
用梘液同清水洗手嘅程序係：
首先沖洗雙手
然後加入梘液，用雙手擦出泡沫
大家要記住一定要揉擦手掌、手背、指隙、指背、拇指、指尖同手腕，喺揉擦時千祈唔好沖水。
揉擦雙手最少20秒後，用清水徹底沖洗乾淨。
然後用乾淨毛巾或抹手紙徹底抹乾雙手，或用乾手機將雙手吹乾。
喺洗乾淨雙手後，唔好再直接觸摸水龍頭，我哋可先用抹手紙包裹，跟住關上；又或者潑水將水龍頭沖洗乾淨，然後才關上。
注意
唔好同其他人共用毛巾或紙巾
抹手紙用後應放入有蓋嘅垃圾桶內
個人用嘅抹手毛巾，應每日至少清洗一次。
用酒精搓手液嘅程序係
將足夠份量嘅酒精搓手液倒喺掌心，然後揉擦手掌、手背、指隙、指背、拇指、指尖同手腕至少20秒，直至雙手乾透。
正確佩戴口罩
首先選擇合適尺碼嘅口罩，
喺佩戴口罩前，必須先清潔雙手
佩戴時，有金屬條嗰一邊向上；口罩有顏色嗰一面向外；應將有摺紋嗰一面向下同埋向外。
綁緊固定口罩嘅繩，或者將口罩嘅橡筋繞喺耳仔。
將口罩嘅金屬條沿鼻樑兩側用手按緊，以確保口罩完全覆蓋口、鼻同下巴，同緊貼面部。
戴好口罩後，應避免再觸摸口罩。
若必須觸摸口罩，喺觸摸前及後都要徹底清潔雙手。
正確脫下口罩
脫下口罩前，應先清潔雙手。
由於口罩可能已沾染病菌，脫下口罩時，雙手應盡量避免接觸口罩。
脫下嘅口罩唔可以重複使用，應立即棄置於有蓋嘅垃圾桶內。
脫下口罩後，應再次清潔雙手。
調校同使用稀釋漂白水嘅方法同步驟係
先打開窗門，使空氣流通。
必須著上保護裝備，例如口罩、膠手套同護眼罩。
稀釋漂白水時必須使用凍水
用量杯準確量度所需漂白水嘅份量
以5.25%次氯酸鈉嘅漂白水為例，稀釋方法如下：
日常環境清潔，可用1比99嘅份量，方法就係，將10毫升漂白水加入990毫升清水內。
濃度 500 ppm
假如喺嘔吐物、排泄物或分泌污染嘅地方或物件，就可用1比49濃度嘅漂白水消毒，調較方法就係將10毫升漂白水加入490毫升清水內。濃度 1000 ppm
假如被血液污染嘅地方或物件，就可用1比4濃度嘅漂白水消毒，調較方法就係將10毫升漂白水加入40毫升清水內。
濃度 10000 ppm
喺用稀釋漂白水時，要留意：
避免喺金屬、羊毛、尼龍、絲綢、染色布料同油漆表面使用。
另外，切勿觸摸眼睛。如果唔小心漂白水彈入眼，要立即用清水沖洗最少15分鐘，然後盡快求診。
由於化學作用，可能導致意外，所以漂白水千祈唔好同其他嘅清潔劑溝埋嚟用。
另外，要注意漂白水應放喺陰涼同埋小朋友掂唔到嘅地方。
由於漂白水嘅有效成份會隨住時間分解，因此最好購買近期生產嘅漂白水，同埋唔好過量儲存。
稀釋後嘅漂白水應該喺24小時內使用。
嘔吐物的處理
員工應先著上適當嘅個人防護裝備，例如手套、口罩等。
先用吸水力強嘅即棄抹布或物料，由外向內清理可見嘅嘔吐物
然後使用適當嘅消毒清潔劑，例如1比49稀釋家用漂白水，由外向內清潔消毒被污染嘅地方同附近2米嘅範圍。
污物用膠袋密封紮好，放入有蓋嘅垃圾桶內。
等15至30分鐘，再用清水沖洗並抹乾。
金屬表面則可用70%酒精抹拭消毒。
處理被污染的床單和衣物
員工須先著上適當嘅個人防護裝備，例如手套、口罩；
如有需要，可著上用後即棄嘅保護衣或圍裙。
注意！
被污染嘅衣物必須獨立處理，首先將固體污穢物去除
然後浸喺1比49稀釋家用漂白水裡面，
即係1份含5.25%次氯酸鈉嘅漂白水，
加入49份清水
等30分鐘後，用清水沖洗乾淨。
然後根據一般清洗衣物嘅程序清潔
此外，職員應避免喺學校同中心內，清洗學童嘅衣服，應小心去除固體嘅污穢物，然後將衣服放入膠袋內，讓家長帶走，以免細菌喺學校同中心內散播。
為保障學童和你哋嘅健康，員工須熟習同遵守預防傳染病嘅控制措施，以減低傳染病散播嘅機會。
本署謹此鳴謝
教育局
社會褔利署
協助完成製作此光碟
如欲獲得更多有關學校/中心
如何預防傳染病的資料，可瀏覽
衞生防護中心網頁www.chp.gov.hk